Për herë të parë, Atélier JR në bashkëpunim me Harabel Contemporary Platform dhe Creative Industries Tirana sollën në Shqipëri projektin “Inside Out”, duke shfaqur energjinë e gjallë dhe diversitetin e peizazhit urban të qytetit.

Furgoni me fotokabinë u pozicionua pas Universitetit të Arteve në Tiranë, e pasi pjesëmarrësit bënë fotot e portretit të tyre, posterat u ngjitën në murin e pjesës së pasme të Universitetit të Arteve.
Në fund, u krijua një mural i madh diversiteti, duke i dhënë lagjes një fytyrë autentike.

Ky aktivitet vuri në dukje ndërveprimet dhe lëvizjet dinamike të njerëzve në hapësirat publike, duke përcjellë mesazhin se qyteti është një entitet i gjallë, i formuar nga veprimet dhe përvojat e banorëve të tij.

Puna e jashtëzakonshme dhe inovatore e artistit francez JR është e shfaqur në Tiranë, pasi ftoi të gjithë qytetarët të bëhen pjesëmarrës aktiv në procesin e tij artistik.

JR është artist me famë botërore, i njohur për përdorimin inovativ të teknikës së kolazhit për të krijuar vepra arti mahnitëse që ngacmojnë mendimin,  të cilat kanë magjepsur miliona qytetarë nga e gjithë bota. Zhanri në të cilin JR punon është një shtrirje mes fotografisë, ndërveprimit shoqëror dhe artit bashkëkohor, duke krijuar vepra të cilat sfidojnë nocionet konvencionale të artit dhe komunitetit.

Atélier JR është i njohur për qasjen ndaj ‘artit infiltrues’, ku JR punon nga afër me komunitetet lokale për të përfshirë këdo në procesin kreativ. Kjo qasje gjithëpërfshirëse lejon këdo që të kontribuojë në veprat e krijuara, duke thyer barrierën tradicionale të vendosur midis artistit dhe audiencës. JR ka qëndruar anonim përgjatë gjithë karrierës së tij, duke preferuar që të lërë artin të komunikojë.

Përgjatë dekadës së fundit projekti ‘Inside Out’ ka tërhequr më shumë se 500,000 pjesëmarrës nga më shumë se 148 shtete dhe territore në të gjithë botën.