“TEMPO” titullohet ekspozita e parë vetjake e Jakup Ferrit, e hapur në Qendrën për Hapje dhe Dialog, ku paraqet një koleksion koheziv veprash që shtrihen nga piktura tek tekstili dhe mozaiku, duke ndërthurur fragmente të jetës së përditshme dhe surrealizmit. Ekspozita do të qëndrojë nga 10 shtatori deri më 10 tetor 2025.
Bota e krijimtarisë së Ferrit është e banuar nga figura kurioze: sportistë, fëmijë, muzikantë, kafshë dhe krijesa të përziera që kapen në skena ëndërrimtare. Këto kompozime e fshijnë kufirin mes reales dhe imagjinatës së artistit. Nëpërmjet vizatimeve që duken të thjeshta, Ferri ndërton peizazhe të ndërlikuara psikologjike dhe kulturore, ku e përditshmja ndërthuret natyrshëm në të jashtëzakonshmen. Gjuha e tij vizuale, njëkohësisht humoristike dhe poetike, ngjan me strukturën e një fabule, ku kuptimi gjendet jo vetëm në atë që shfaqet, por edhe në mënyrën si është ndërtuar dhe si perceptohet.
Veçanërisht tërheqës janë mozaikët në letër, një seri e krijuar nga ambalazhe të ricikluara të produkteve të ndryshme, të cilat janë ekspozuar përgjatë korridorit të COD. Ferri i transformon mbetjet industriale në copa të vogla, të ndritshme, duke i dhënë jetë të re materiale të hedhura tutje. Këto fragmente, të prera dhe të vendosura me kujdes, imitojnë mozaikët prej guri, ndërsa ruajnë brishtësinë e letrës. Ky transformim, shpesh i fshehur pas imazheve narrative, fton publikun të afrohet dhe të vërejë më nga afër.
Thellësisht i rrënjosur në traditat e vendlindjes së tij, Ferri shpesh përfshin në praktikën e tij qëndisjen dhe tapicerinë tradicionale. Në “TEMPO”, këto elemente nuk janë thjesht dekorative, ato shërbejnë si ura vizuale dhe konceptuale mes të kaluarës dhe së tashmes. Modelet abstrakte ndërthuren me paraqitje figurative, dhe janë të ekspozuara në të gjithë hollin e COD.
Në fund, “TEMPO” është më shumë se një paraqitje e aftësive teknike të Ferrit apo imagjinatës së tij, është njëkohësisht aktuale dhe e përjetshme.
Jakup Ferri është një artist bashkëkohor nga Kosova, i lindur në Prishtinë në vitin 1981. Ai njihet për stilin e tij të veçantë që ndërthur artin naiv, traditat popullore dhe temat bashkëkohore, duke përdorur mediume të ndryshme si vizatime, qëndisma dhe instalacione. Veprat e tij shpesh trajtojnë tema si identiteti, jeta e përditshme dhe çështjet sociale, duke i paraqitur ato me një qasje lozonjare ose ironike. Ferri ka studiuar në Akademinë e Arteve në Prishtinë dhe më pas në Rijksakademie van Beeldende Kunsten në Amsterdam. Ai ka ekspozuar në mënyrë të rregullt në skenën ndërkombëtare të artit, përfshirë pjesëmarrjen në Bienalen e Venecias në vitin 2007 dhe sërish në 2022, ku përfaqësoi Kosovën. Puna e tij karakterizohet nga bashkëpunimi me zejtarë lokalë dhe një interes i veçantë për ruajtjen e teknikave tradicionale, të cilat i përfshin në narrativa moderne.
